काठमाडौं, २५ फागुन २०८२ । राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध दायर भएका सहकारी ठगीसँगै संगठित अपराध र सम्पत्ति शुद्धीकरण मुद्दाको अभियोग पत्र संशोधन विवादको रिट ‘हेर्न नभ्याइने’ सूचीमा परेको छ ।
सर्वोच्च अदालतका न्यायाधीशद्वय नहकुल सुवेदी र अब्दुल अजीज मुसलमानको संयुक्त इजलासमा सोमबार (फागुन २५) सुनुवाइका लागि ‘झ’ नम्बरमा पेसी तय भएको थियो ।
महान्यायाधिवक्ता सविता भण्डारीले मुद्दा संशोधन गर्न मातहतका सरकारी वकिलको कार्यालयमा निर्देशन दिने गरी भएको निर्णयविरुद्ध वरिष्ठ अधिवक्ता दिनेश त्रिपाठी, ल कलेजका विद्यार्थी आयुष बडाल र सिन्धुलीका अभियन्ता युवराज पौडेल ‘सफल’ले रिट दिएका हुन् ।
महान्यायाधिवक्ता भण्डारीले पुस ३० गते लामिछानेलाई संगठित अपराध र सम्पत्ति शुद्धीकरणसम्बन्धी मुद्दा संशोधनका लागि जिल्ला सरकारी वकिल कार्यालयहरूलाई निर्देशन दिएकी थिइन् । निर्देशनपछि कास्की र रूपन्देही जिल्ला अदालतमा मुद्दा संशोधनका लागि निवेदन पेस भइसकेको छ । ती जिल्ला अदालतबाट सर्वोच्चले निर्णय दिएपछि मात्र मुद्दा संशोधन विवादमा निर्णय हुने भन्दै विचाराधीन अवस्थामा राखिएको छ ।
