वीरगञ्ज, १७ पुस । वीरगञ्जबाट प्रहरीले भन्सार छली गरी ल्याएको ८५ हजार मुल्य बराबरको कपडासहित दुई जनालाई नियन्त्रणमा लिएको छ ।
वीरगञ्ज महानगरपालिका–२५, खल्वाटोला बस्ने अजय सहनी र विरेश पटेललाई प्रहरीले पक्राउ गरेको हो । प्रहरीले उनीहरुको साथबाट ऊनी स्वीटर ९६ पिस, ऊनी कै कुर्ता सुरुवाल ५९ पिस गरी अन्दाजी ८५ हजारको कपडा र २ थान साइकल बरामद गरेको छ ।
गैरकानुनी तवरले भारतबाट नेपालतर्फ ल्याउँदै गरेको अवस्थामा कपडा सहित उनीहरुलाई पक्राउ गरिएको प्रहरीले जनाएको छ । भन्सार चोरी पैठारी तथा ओसार पसार कार्य नियन्त्रण गर्न खटिएका प्रहरी टोलीले चेकजाँच गर्ने क्रममा वीरगञ्ज महानगरपालिका–१० बाट कपडा सहित सहनी र पटेललाई पक्राउ गरेको जिल्ला प्रहरी कार्यालय, पर्साले जनाएको छ ।
ठाकुरराम बहुमुखी क्याम्पस पछाडिबाट साइकलमा लोड गरि ल्याउँदै गरेको अवस्थामा उनीहरुलाई नियन्त्रणमा लिइएको प्रहरी उपरीक्षक रेवती ढकालले जानकारी दिए । प्रहरीले उनीहरुलाई आवश्यक कारबाहीका लागि वीरगञ्ज भन्सार कार्यालयमा बुझाएको छ ।
