Online Bichar
सोमबार, आषाढ ११, २०८१ | Monday, June 24, 2024

झापा, १९ असोज २०८० । ग्याङ फाइट गर्न भनेर हिँडेका युवाको समूहलाई प्रहरीले विराटनगर– ९ घोघापुल चोकबाट पक्राउ गरेको छ । युवतीको विषयलाई लिएर हुन आटेको ग्याङ फाइट गर्न हिँडेको १५ जनाको समूहलाई मोरङ प्रहरीले आज दिउँसो तरबारसहित पक्राउ गरेको हो ।

पक्राउ पर्ने मोरङ र सुनसरीका रहेका छन् । प्रहरीले कटहरि ४ का १८ वर्षीय शेषकवि अली, सुनसरी बर्जू गाउँपालिकाका विजय चौधरी, सोही ठाउँका राहुल दास र १९ वर्षीय ललनकुमार मेहतासहित १५ जनालाई पक्राउ गरेको मोरङ प्रहरीका प्रवक्ता डिएसपी रन्जनकुमार दाहालले जानकारी दिए । पक्राउ परेका अन्य १२ जना नावालक रहेकाले प्रहरीले उनीहरुको नाम गोप्य राखेको छ ।

पक्राउ परेका अलीको साथबाट प्रहरीले तरबार फेला पारेको हो । उनीहरूको साथबाट प्रहरीले खुँडा, लाठीलगायतका हातहतियार बरामद गरेको छ । पक्राउ परेका अलीको समूह विराटनगरको घोगापुल चोकमा जम्मा भएर दुई वटा सिटीमा ग्याङ फाइट गर्ने उद्देश्यले शान्ति चोक जान भनेर हिँडेका थिए । ‘उक्त सूचना प्रहरीले बेलैमा पायो । मोरङ प्रहरीबाट टोली परिचालन भयो र उनीहरूको साथबाट हातहतियारसहित पक्राउ गर्न सफल भयो । आज हुनसक्ने ठुलो दुर्घटना प्रहरीले रोक्न सफल भएको छ,’ मोरङ प्रहरीका प्रवक्ता डिएसपी दाहालले भने ।

पक्राउ परेका १५ जनलाई प्रहरीले नियन्त्रणमा लिएर अनुसन्धान सुरु गरेको उनले बताए । ‘अहिले घटनाको अनुसन्धान गर्दै आएका छौँ,’ डिएसपी दाहालले भने, ‘अर्को समूहको को रहेछ । त्यसको पनि पहिचान गर्ने काम भइरहेको छ ।’

 

तपाईको प्रतिक्रिया