Online Bichar
शनिबार, बैशाख २९, २०८१ | Saturday, May 11, 2024

काठमाडौं,  १८  भदौ  ।  आईओएमको कार्यालयमा विद्यार्थीहरुले लगाएको ताला प्रहरीले खुलाएको छ । ताला खोलिएसँगै एमबीबीएसको प्रवेश परीक्षा तोकिएकै मितिमा हुने शिक्षा मन्त्रालयले जनाएको छ । एमबीबीएसको प्रवेश परीक्षा आगामी २१ गते तोकिएको छ । प्रवेश परीक्षा पूर्वनिर्धारित मितिमै गर्नका लागि ताला खुलाइएको शिक्षा मन्त्री गिरिराजमणि पोखरेलको सचिवालयले जनाएको छ ।

यसअघि शिक्षासम्बन्धी विभिन्न माग राखी चिकित्साशास्त्र अध्ययन संस्थान महाराजगञ्जको स्ववियु र बिभिन्न विद्यार्थी संगठनहरुले तालाबन्दी गरेका थिए । चिकित्सा शिक्षा ऐनले प्रावधान गरेको ७५ प्रतिशत छात्रवृत्ति यसै शैक्षिक सत्रबाट लागू गराउनुपर्नेलगायतका माग विद्यार्थीहरुले राखेका छन् । ७५ प्रतिशत निःशुल्क छात्रवृत्तिको व्यवस्था यसै वर्षदेखि लागू गर्ने मन्त्रालयका अधिकारीहरु बताउँछन् ।

राष्ट्रिय चिकित्सा शिक्षा ऐन २०७५ कार्यान्वयनको चरणमा रहेको भन्दै शिक्षा मन्त्रालयले विज्ञप्ति जारी गरेको भोलिपल्टै प्रहरीले ताला खुलाएको हो । मन्त्रालयका प्रवक्ता बैकुण्ठ अर्यालका अनुसार ऐनमा व्यवस्था भएबमोजिम चिकित्सा शिक्षा आयोगमा उपाध्यक्ष नियुक्त गर्ने, चिकित्सा शिक्षा नियमावली तर्जुमा गर्नेलगायतका कामका लागि प्रक्रिया अघि बढेका छन् ।

तपाईको प्रतिक्रिया