काठमाडौं, २० कार्तिक २०८३ । कर्णाली याक्सलाई ३९ रनले पराजित गर्दै सुदूरपश्चिम रोयल्स नेपाल प्रिमियर लिग (एनपीएल) को तेस्रो सिजनमा दोस्रो स्थानमा उक्लिएको छ ।
यो जितसँगै सुदूरपश्चिमले तालिकामा ६ अंक जोड्यो । सुदूरपश्चिमले पाँच खेलमा तीन जित र दुई हार व्यहोरेको छ । दोस्रो स्थानमा उक्लिएपछि सुदूरपश्चिमको प्लेअफ सम्भावना बलियो बनेको छ ।
शुक्रबार कीर्तिपुरस्थित त्रिवि क्रिकेट रंगशालामा सुदूरपश्चिमले प्रस्तुत गरेको १७७ रनको चुनौतीपूर्ण लक्ष्य पछ्याएको कर्णालीले निर्धारित २० ओभरमा सात विकेट गुमाएर १३७ रन मात्र बनाउन सक्यो ।
कर्णालीलाई सस्तैमा रोक्न स्कट कुगेलेइनले दुई विकेट लिए । हेमन्त धामी, अनिल खरेल, कप्तान दीपेन्द्रसिंह ऐरी, थरिन्दु रथनायके र अभिनाश बोहराले समान एक विकेट लिए ।
कर्णालीका लागि डेविड मिलरले मात्र सन्तोषजनक प्रदर्शन गरे । मिलरले ९३ रनको अर्धशतकीय पारी खेल्दै टोली उकास्न प्रयास गरेका थिए । मिलरको यो डेब्यु खेल पनि थियो । गत बुधबार मात्रै प्रतियोगिताका लागि नेपाल आएका उनले अर्धशतक प्रहार गर्ने क्रममा ५५ बलमा पाँच चौका र सात छक्का प्रहार गरेका थिए ।
उनले कप्तान सोमपाल कामीसँग ३६ रनको साझेदारी गरेका थिए । तर, अभिनाशविरुद्ध छक्काको प्रयास गर्दा सोमपाल क्याच हुन पुगेपछि उनीहरूबीचको साझेदारी तोडिएको थियो ।
दीपक डुम्रेले १८ रन बनाए । उनीहरूबाहेक टोलीका मुख्य खेलाडीहरूले सन्तोषजनक प्रर्दशन गर्न सकेनन् । ओपनर आरिफुल इस्लाम, मार्क वाट, पवन सर्राफ, सोमपाल र गुल्सन झाले दोहोरो अंकमा रन बनाउन सकेनन् ।
सोमपालले आठ रन बनाए । पवनले पाँच, मार्कले चार र गुल्सनले तीन रन बनाए । यसबाहेक अविजित रहेका नन्दन यादवले पाँच र हुसेन तलतले एक रन मात्र जोड्न सके ।
त्यसअघि टस हारेर ब्याटिङमा आएको सुदूरपश्चिमले निर्धारित २० ओभरमा ६ विकेट गुमाएर १७६ रनको योगफल खडा गरेको हो ।
सैफ जैबले ३५ रन बनाए । २४ बलमा उनले चार चौका र एक छक्का प्रहार गरे । विनोद भण्डारीले २७ रन बनाए । यी दुईले सुरुआतमै ६८ रनको अर्धशतकीय साझेदारी गर्दै टोलीलाई बलियो सुरुआत दिलाए । उनीहरूको जोडी जमेपछि पावर प्लेमै सुदूरपश्चिमले ६३ रन बनाएको थियो ।
ब्रान्डन म्याकमुलेनले २४ रन बनाए । इशान पाण्डेले २३, थरिन्दुले २२, अविजित रहेका स्कटले १३, आरिफ शेखले ११ र कप्तान दीपेन्द्रले १० रन बनाए ।
कर्णालीका लागि मार्कले दुई विकेट लिए । त्यसैगरी, नन्दन, हुसेन र सूर्य तामाङले समान एक विकेट लिए ।
हारसँगै कर्णाली तालिकाको पाँचौँ स्थानमा झरेको छ । चार खेलबाट चार अंक बनाएको कर्णाली रनरेटका आधारमा पछाडि परेको हो । हारबाट टोलीको प्लेअफ सम्भावना पनि चुनौतीपूर्ण बनेको छ ।
