जेनेभा, २२ असार २०८३ । प्रजातान्त्रिक गणतन्त्र कंगोमा फैलिएको इबोला महामारीबाट ५०० भन्दा बढी व्यक्तिको मृत्यु भएको विश्व स्वास्थ्य संगठन ९डब्ल्यूएचओ० ले सोमबार सार्वजनिक गरेको तथ्यांकले देखाएको छ ।
संयुक्त राष्ट्रसंघको स्वास्थ्य निकायले जारी गरेको अद्यावधिक तथ्यांकअनुसार मे महिनाको मध्यतिर महामारी घोषणा भएयता कंगोमा एक हजार ५६१ जना संक्रमित भएका छन्, जसमध्ये ५०६ जनाको मृत्यु भएको छ ।
छिमेकी देश युगान्डामा पनि दुईजनाको मृत्यु भएको छ । त्यहाँ अवस्था अपेक्षाकृत स्थिर छ र २० जना संक्रमितमध्ये १६ जना निको भएका छन् ।
कंगोको तथ्यांकअनुसार यो महामारीमा संक्रमितमध्येबाट भएको मृत्युदर ३२ प्रतिशत रहेको छ ।
२५४ जना बिरामी निको भएका छन् भने घातक ज्वरोका ३५४ जना शंकास्पद बिरामीहरूको अनुसन्धान भइरहेको छ ।
उत्तर–पूर्वी कंगोमा फैलिएको यो महामारी चार प्रान्तमा पुगेको छ तर मुख्य रूपमा इटुरी प्रान्तमा केन्द्रित छ ।
‘बुन्डिबुग्यो’ प्रजातिको इबोलाबाट यो महामारी फैलिएको हो, जसको लागि अहिलेसम्म कुनै स्वीकृत खोप वा उपचार उपलब्ध छैन ।
बुन्डिबुग्यो इबोलाको दुई सम्भावित उपचारको परीक्षण गत बिहीबारदेखि कंगोमा सुरु भएको छ ।
यो परीक्षणमा ‘मोनोक्लोनल एन्टिबडी एमबीपी १३४’ र ‘एन्टिभाइरल’ औषधि ‘रिमडेसिभिर’को एक्लै र संयोजनमा सुरक्षा र प्रभावकारिता जाँच गरिँदै छ ।
पाँच सय जनाको मृत्युको यो आँकडा आउँदा डब्ल्यूएचओ सदस्य राष्ट्रहरू गत वर्ष कोभिड–१९ महामारीको जस्तो अन्तर्राष्ट्रिय अव्यवस्था दोहोरिन नदिनका लागि तयार पारिएको महामारीबारे सम्झौताको बाँकी भागमा छलफल गर्न फेरि भेला भएका छन् ।
डब्ल्यूएचओका महानिर्देशक टेड्रोस अधानोम घेब्रेयेससले सोमबार सदस्य राष्ट्रहरूलाई चेतावनी दिँदै भने, “अर्को महामारीले हामीलाई तयार हुनका लागि पर्खने छैन ।”
उनले भने, “अहिले कंगोमा भइरहेको इबोला महामारी यसको प्रमाण हो । यो कुनै टाढाको काल्पनिक घटना होइन, यो वास्तवमै भइरहेको छ ।”
उनले अगाडि भने, “इबोला अर्को महामारी नहुन सक्छ । तर, यो एउटा दुःखद सम्झना हो कि खतरा कहिल्यै पूर्ण रूपमा हराउँदैन ।”
कंगोको यो १७औँ इबोला महामारी गत मे १५ मा खनिज सम्पन्न तर अशान्त इटुरी प्रान्तमा केही अज्ञात कारणले मृत्यु भएपछि घोषणा गरिएको थियो । यो भाइरस निकट सम्पर्क र सङ्क्रमित शारीरिक तरल पदार्थबाट फैलिन्छ ।
फ्रान्सका स्वास्थ्यमन्त्रीले शनिबार बताएअनुसार डीआर कंगोबाट फ्रान्स गएर इबोला सङ्क्रमण पुष्टि भएको पहिलो चिकित्सकलाई निको भएपछि अस्पतालबाट घर पठाइएको छ । उनी जुन २३ मा कङ्गोबाट फ्रान्स जानुभएको थियो । रासस/एएफपी
