अंकारा, १७ जेठ २०८३ । टर्कीमा आइतबार बिहान भएको भयानक दुर्घटनामा आठ जनाको मृत्यु भएको छ । पश्चिमी टर्कीमा एउटा यात्रुबाहक बसमा आगलागी हुँदा आठ जनाको मृत्यु भएको छ । मृतकमध्ये एक ९ महिनाको शिशु पनि रहेको स्थानीय सञ्चारमाध्यमले जनाएका छन् ।
रिपोर्टका अनुसार पर्यटन कम्पनी पामुक्कले टुरिज्मको बस आइतबार बिहान करिब १ः४० बजे डेनिजली प्रान्तमा राजमार्ग सुरक्षा अवरोधसँग ठोक्किएको थियो, जसका कारण बसमा आगो लागेको थियो । बस इज्मिरबाट भूमध्यसागरीय तटीय शहर अन्टाल्या जाँदै थियो । दुर्घटनाको समयमा बसमा ३८ यात्रु र चालक दलका तीन सदस्यहरू सवार थिए ।
यस घटनामा ३३ जना घाइते भएका छन् । मृतकहरूमा ५० वर्षीय बस चालक र ९ महिनाको बच्चा पनि समावेश रहेको बताइएको छ ।
दुर्घटनाका तस्बिरहरूले बसको पूर्ण रूपमा जलेको संरचना सडकको छेउमा पल्टिएको देखाउँछन् । शनिबार इद अल–अधाको अन्तिम दिन थियो । टर्कीमा हुने यो धार्मिक पर्वको समयमा धेरै संख्यामा मानिसहरू आफ्नो परिवारलाई भेट्न र बिदा मनाउन यात्रा गर्छन्, जसले गर्दा टर्कीमा सडक दुर्घटनाको संख्यामा वृद्धि हुन्छ ।
