काठमाडौं, ६ वैशाख २०८३ । दक्षिण लेबनान को घन्दुरिया गाउँमा शनिबार भएको आक्रमणमा एक फ्रान्सेली शान्ति सैनिकको ज्यान गएको छ भने अन्य तीनजना घाइते भएका छन् । घाइतेमध्ये दुईजनाको अवस्था गम्भीर रहेको जनाइएको छ ।
क्याथरिन भोत्रिन का अनुसार गस्तीमा खटिएको टोली राष्ट्रसंघीय पोस्टसम्म पुग्ने बाटो खोल्ने र विस्फोटक पदार्थ हटाउने क्रममा एम्बुसमा परेको थियो । गोली प्रहारका कारण सैनिकको मृत्यु भएको अन्तर्राष्ट्रिय सञ्चारमाध्यमहरूले जनाएका छन् ।
फ्रान्सका राष्ट्रपति इमानुएल म्याक्रोँ ले घटनालाई ‘असह्य आक्रमण’ भन्दै यसको पछाडि हिजबुल्लाह को संलग्नता रहेको दाबी गरेका छन् । तर, हिजबुल्लाहले विज्ञप्ति जारी गर्दै घटनामा आफ्नो कुनै हात नरहेको बताउँदै आरोप अस्वीकार गरेको छ ।
राष्ट्रपति म्याक्रोँले जोसेफ औन र प्रधानमन्त्री नवाफ सलाम सँग टेलिफोन संवाद गरी दोषीमाथि कारबाही गर्न आग्रह गरेका छन् ।
यसैबीच, एन्टोनियो गुटेरेस ले शान्ति सैनिकमाथिको आक्रमणको कडा निन्दा गर्दै यस्ता गतिविधि तत्काल रोक्न आह्वान गरेका छन् । उनले मृतकप्रति श्रद्धाञ्जली अर्पण गर्दै घाइतेहरूको शीघ्र स्वास्थ्य लाभको कामना गरेका छन् ।
भारत ले घटनाको निन्दा गर्दै निष्पक्ष अनुसन्धान र दोषीलाई कारबाही गर्न माग गरेको छ भने कुवेत ले यसलाई अन्तर्राष्ट्रिय कानुनको उल्लंघन भनेको छ ।
शान्ति सैनिकमाथि आक्रमण बढ्दो
गत मार्च २ देखि इजरायल र हिजबुल्लाहबीच द्वन्द्व पुनः सुरु भएयता शान्ति सैनिकहरू बारम्बार आक्रमणको निसानामा पर्दै आएका छन् । मार्च ६ मा अल कउजाह बेसमा गोलाबारी हुँदा तीन सैनिक घाइते भएका थिए ।
त्यसैगरी, मार्च ३० मा अदचित अल कुसायरमा विस्फोट हुँदा एक इन्डोनेसियाली सैनिकको मृत्यु र अर्का एक गम्भीर घाइते भएका थिए । सोही दिन बनी ह्यान क्षेत्रमा सवारी विस्फोटमा दुई सैनिकको मृत्यु र दुई घाइते भएका थिए ।
अप्रिल ७ मा एक शान्ति सैनिकलाई नियन्त्रणमा लिइएको थियो भने अप्रिल १२ मा ट्यांकले शान्ति सैनिकको सवारीसाधनमा ठक्कर दिँदा क्षति पुगेको थियो ।
सन् १९७८ देखि लेबनानमा तैनाथ शान्ति सैनिकहरूको कार्यादेश यसै वर्षको अन्त्यमा सकिँदैछ । पछिल्ला घटनाक्रमले युद्धग्रस्त क्षेत्रमा शान्ति स्थापना प्रयास थप चुनौतीपूर्ण बन्दै गएको देखिएको छ ।
लेबनानी सेनाले घटनाको अनुसन्धान सुरु गरिसकेको छ । शान्ति स्थापनामा खटिएका सैनिकमाथि बढ्दो आक्रमणले अन्तर्राष्ट्रिय समुदायमा चिन्ता थपिएको छ ।
