काठमाडौं, ५ वैशाख २०८३ । होर्मुज स्ट्रेट क्षेत्रमा पुनः तनाव बढेको छ। शनिबार दुई भारतीय झन्डावाहक जहाजमाथि गोलीबारी भएपछि दुवै जहाजले आफ्नो मार्ग परिवर्तन गर्नुपरेको अन्तर्राष्ट्रिय सञ्चारमाध्यमले जनाएका छन्।
बीबीसी हिन्दीका अनुसार समुद्री यातायात निगरानी गर्ने वेबसाइट ‘ट्यांकरट्र्याकर्स’लाई उद्धृत गर्दै भारतीय कार्गो जहाज शीप जग अर्नव र तेल ट्यांकर सनमार हेराल्डमाथि गोलीबारी भएको उल्लेख गरिएको छ। घटनापछि दुवै जहाज युटर्न गरी सुरक्षित दिशातर्फ फर्किएका थिए।
रिपोर्टअनुसार तेल ट्यांकर सनमार हेराल्ड इराकबाट तेल बोकेर यात्रा गरिरहेको थियो। जहाजमाथि इरानको इस्लामिक रिभोल्युसनरी गार्ड कोर (आईआरजीसी) ले गोलीबारी गरी बाटो परिवर्तन गर्न आदेश दिएको दाबी गरिएको छ।
यसअघि बेलायतको मेरिटाइम ट्रेड अपरेसनले पनि होर्मुज स्ट्रेटमा एक ट्यांकरमाथि गोलीबारी भएको पुष्टि गरेको थियो। उक्त घटना ओमानबाट करिब २० नटिकल माइल उत्तरपूर्वमा भएको बताइएको छ।
यता, इरानले केही दिनअघि मात्र होर्मुज स्ट्रेट पूर्ण रूपमा खुला रहेको घोषणा गरेको थियो। तर पछिल्ला घटनापछि इरानी मिडियाले उक्त क्षेत्रमा पुनः नियन्त्रण कायम गरिएको दाबी गरेका छन्, जसका कारण केही जहाजहरूले आफ्नो यात्रा मार्ग परिवर्तन गरेका छन्।
अमेरिका र इरानबीचको कूटनीतिक तनावका बीच जारी वार्ता समेत निष्कर्षविहीन बनेको छ। पछिल्लो चरणको शान्तिवार्ता पाकिस्तानको इस्लामाबादमा सम्पन्न भए पनि कुनै सहमति हुन सकेको थिएन।
यसैबीच, अमेरिकाका पूर्व राष्ट्रपति डोनाल्ड ट्रम्पले इरानसँग ठूलो सम्झौता नभए बुधबारभित्र पुनः कारबाही सुरु हुन सक्ने चेतावनी दिएको बताइएको छ।
