झापा, ४ वैशाख २०८१ । नक्कली सुन देखाई ठगी गर्ने एकजना भारतीय बिर्तामोडमा पक्राउ परेका छन् । पक्राउ पर्नेमा भारत जल्पाइगुडी–४० सिलिगुडी बस्ने ५४ वर्षीय शेरबहादुर गिरी रहेका छन् । उनलाई हिजो दिउँसो बिर्तामोड नगरपालिका वडा नं.५ शनिश्चरे रोडमा फेला पारी नियन्त्रणमा लिइएको हो ।
हिजो दिउँसो अन्दाजी २ः३९ बजेको समयमा बिर्तामोड नगरपालिका वडा नं.५ शनिश्चरे रोडमा बुद्धशान्ति गाउँपालिका वडा न.२ बस्ने ४५ वर्षीया सविता सिटौलालाई गिरीले ‘मसंग काँचो सुन छ। तपाईलाई म रु.६० हजारमा काँचो सुन दिन्छु’ भनी ललाई फकाई ६० हजार रकम लिई सवितालाई बिस्कुट जस्तो आकारको नक्कली सुन (टिल) दिएर ठगी गरेका थिए ।
पीडितले इलाका प्रहरी कार्यालय बिर्तामोडमा जानकारी गराउना साथ उक्त कार्यालयबाट खटिएको प्रहरी टोलीले गिरीलाई शनिश्चरे रोडमा फेला पारी नियन्त्रणमा लिई सो घटना सम्बन्धमा थप अनुसन्धान भइरहेको जिल्ला प्रहरी कार्यालयले जनाएको छ ।
