१७ असार २०७८ । कतारमा रहेका नेपाली नागरिकलाई डिजिटल ठगीबाट बच्न नेपाली दूतावासले आग्रह गरेको छ । टेलिफोन नम्बरहरुबाट सम्पर्क गरी विभिन्न बहानामा आफ्ना वैयक्तिक जानकारीहरु लिने र त्यसको दुरुपयोग गरी बैंक खाताबाट अनधिकृत रुपमा पैसा झिक्ने गरेका गुनासा आएको भन्दै त्यसतर्फ सतर्क रहन कतारमा रहेको नेपाली दूतावासले आग्रह गरेको हो ।

व्यक्ति स्वयमले एटिएम कार्डको पिन कोड वा बैंकबाट प्राप्त ओटीपी नम्बर जस्ता सूचना कसैलाई दिएर त्यसको प्रयोग गरी खाताबाट पैसा झिकिएमा कुनै कारबाही नहुने त्यहाँका बैंकहरुले जनाएका छन् ।

त्यसैले आवश्यक परेको अवस्थामा यस्ता विवरण आफै उपस्थित भएर उपलब्ध गराउन पनि दूतावासको अनुरोध छ । कतारको प्रहरी, गृह मन्त्रालय लगायत सरकारी निकाय तथा कतारमा रहेका बैंकहरुले टेलिफोनमार्फत एटिएम कार्ड, पिन कोड वा एटीपी कोड लगायत वैयक्तिक विवरण नमाग्ने गरेको दूतावासले जनाएको छ ।

यदि कसैले फोन गरेर वा अन्य माध्यमबाट यस्ता वैयक्तिक विवरण माग गरेमा कतारको गृह मन्त्रालयको फोन नम्बर २३४७४४४ वा ६६८१५७५७ मा सम्पर्क गर्न वा सम्बन्धित् बैंकलाई जानकारी गराउन दूतावासले आग्रह गरेको छ ।

 

तपाईको प्रतिक्रिया

Comments