काठमाडौं, २४ जेठ २०८३ । नाइजरको सहारा मरुभूमिमा तिर्खामा पानी पिउन नपाएर कम्तीमा ४९ जनाको मृत्यु भएको छ ।
बीबीसीका अनुसार उनीहरू सवार ट्रक बीच बाटोमै बिग्रिएको थियो । यात्रुहरूले कयौँ दिनसम्म ट्रक मर्मत गर्ने प्रयास गरे पनि सफल हुन सकेनन् ।
उक्त ट्रक मालीको हारौबा सहरबाट प्रस्थान गरेको थियो, जुन नाइजरको सीमाबाट ३०० किलोमिटरभन्दा बढी टाढा पर्छ । यात्रुहरू एक मुस्लिम धार्मिक उत्सवमा सहभागी भएर फर्किरहेका थिए । सोही क्रममा उनीहरू सवार ट्रक बिग्रिएको थियो ।
उनीहरू मरुभूमिको यस्तो क्षेत्रमा फसेका थिए, जहाँ तापक्रम अत्यधिक हुने गर्छ । त्यस्तो स्थानमा पानी तथा अन्य आवश्यक सामग्री प्राप्त गर्न अत्यन्त कठिन हुन्छ । लामो समयसम्म फसेर बस्नुपर्दा उनीहरूसँग भएको पानी पनि सकिएको थियो ।
यस घटनामा दुईजना मात्र जीवित बच्न सफल भए । उनीहरूले जसोतसो मरुभूमि पार गर्दै नजिकैको असामाका सहरसम्म पुगेर स्थानीय अधिकारीहरूलाई घटनाबारे जानकारी दिएका थिए ।
उद्धार टोली घटनास्थलमा पुग्दा ट्रकको मुनि र वरिपरि दर्जनौँ शव छरिएका अवस्थामा फेला परेका थिए ।
उद्धार टोलीले मृतकहरूको शव सामूहिक चिहानमा समाधिस्थ गरेको थियो । घटनास्थलबाट फर्कने क्रममा टोलीले अर्को एउटा बिग्रिएको ट्रक पनि फेला पारेको थियो ।
उक्त ट्रकमा ६० जनाभन्दा बढी यात्रु सवार थिए । ट्रकको ब्याट्री बिग्रिएका कारण उनीहरू तीन दिनदेखि मरुभूमिमा फसेका थिए ।
उद्धार टोलीले अत्यधिक थकित र पानीको अभावले छटपटाइरहेका यात्रुहरूलाई पानी उपलब्ध गराएको थियो । साथै, ट्रक मर्मत गर्न सहयोग गरेपछि उनीहरू सकुशल गन्तव्यतर्फ जान सफल भएका थिए ।
