सप्तरी, १ फागुन । सप्तरीको कंचनरुप नगरपालिका-१० भोडहामा पाटे चितुवाको आक्रमणबाट पाँचजना घाइते भएका छन् ।
बुधबार बिहान ६ बजेतिर कंचनरुप नगरपालिका-१२ स्थित जंगल क्षेत्रबाट आएको पाटे चितुवाले आक्रमण गर्दा पाँच जना घाइते भएको सप्तरी प्रहरीले जनाएको छ ।
घाइते हुनेमा कंचनरुप नगरपालिका-१० भोडहका ६० वर्षीया राजवती देवी चौधरी, ३७ वर्षीय भरत चौधरी, हिरानन्द चौधरी, महावती चौधरी, र सत्य नारायण चौधरी छन् ।
घाइतेमध्ये राजवतीदेवीको स्थानीय अस्पतालमा तथा बाँकीलाई थप उपचारका लागि विराटनगर पठाइएको जिल्ला प्रहरी कार्यालय, राजविराजले जनाएको छ ।
चितुवा आएको खबर पाउनासाथ इलाका प्रहरी कार्यालय कंचनपुर तथा कोशी टप्पु बन्यजन्तु आरक्ष पथरी सप्तरी पोष्टबाट रेन्जरको टोलीले घाइते अवस्थाको चितुवालाई स्थानीयको सहयोगमा जालले छोपी नियन्त्रणमा लिएको छ ।
चितुवालाई समेत उपचारको लागि कोशी टाप्पु बन्यजन्तु आरक्षको कार्यालय कुशाहा सुनसरी लगिएको प्रहरीले जनाएको छ ।
