काठमाडौं, ९ कार्तिक २०८० । त्रिदेशीय टी-ट्वान्टी अन्तर्राष्ट्रि क्रिकेट सिरिजको समूह चरणको अन्तिम खेलमा यूएई हङकङसँग ६९ रनले पराजित भएको छ । तर पराजित भएर पनि यूएईले फाइनलमा स्थान बनाएको छ ।
दुवै टोलीले समूह चरणमा चार खेलबाट दुई–दुई अंक जोडे पनि रनरेटका आधारमा यूएई फाइलनमा पुगेको हो ।
काठमाडौंको मूलपानी क्रिकेट मैदानमा हङकङले दिएको २ सय १३ रनको लक्ष्य पछ्याएको यूएई निर्धारित २० ओभरमा ५ विकेट गुमाएर १ सय ४३ रनमा समेटियो । यूएईका खलिद साहले सर्वाधिक ३५ रन बनाए । यस्तै, निलन्स केसवानीले ३१ तथा बसिल अहमद र एलिसन सराफुले ३०–३० रन जोडे । हङकङका इसान खान, आयुस सुक्ला, नसरुलाह राना र यासिम मुर्तजाले एक–एक विकेट लिए ।
यसअघि टस जितेर पहिलो ब्याटिङ गरेको हङकङले निर्धारित २० ओभरमा ३ विकेटको क्षतिमा २ सय १२ रन बनाएको थियो । हङकङका मार्टिन कोएट्जीले सर्वाधिक ८६ रनको अर्धशतकीय इनिङ खेले । यस्तै, बाबर हायतले ६० रनको अर्धशत पार गर्दा अन्शुमन रथले ४१ रन जोडे । यूएईका निलान्स केसवानी, सञ्चित शर्मा र अकिफ राजाले एक–एक विकेट लिए ।
अब यूएईले फाइनलमा नेपालसँग खेल्ने छ । फाइनल खेल शुक्रबार बिहान ११ बजे कीर्तिपुरस्थित त्रिवि क्रिकेट मैदानमा हुने छ ।
