काठमाडौं, १९ वैशाख २०८० । माई खोला हाइड्रोपावर लिमिटेडको आईपीओ मंगलबार बिहान बाँडफाँट भएको छ । कम्पनीको शेयर निष्काशन तथा बिक्री प्रबन्ध प्रभु क्यापिटलको कार्यालयमा कम्पनीको आईपीओ बाँडफाँट भएको हो ।
सो आईपीओमा कुल १३ लाख ६३ हजार २६६ आवेदकबाट १ करोड ५१ लाख ६५ हजार ८३० कित्ताका लागि आवेदन परेको थियो । सोमध्ये कम्पनीको आईपीओमा १२ लाख ७३ हजार ८९१ जनाको योग्य आवेदन परेको छ । यस्तै, ८९ हजार ८३० जनाको आवेदन रद्द भएको छ ।
स्वीकृत आवेदनमध्ये १ लाख २६ हजार ९४१ जनाले मात्रै १० कित्ताका दरले शेयर पाएका छन् । त्यस मध्येबाट पनि एक जना भाग्यमानीले थप एक कित्ता शेयर पाएका छन् ।
सो आईपीओमा माग भन्दा बढी आवेदन परेकोले धितोपत्र निष्कासन तथा बाँडफाँट निर्देशिका अनुसार गोलाप्रथाबाट आईपीओ बाँडफाँट भएको छ ।
कम्पनीले वैशाख ८ गतेदेखि १२ गतेसम्म सर्वसाधारणका लागि प्रतिशेयर १०० अंकित मूल्यका १ लाख २६ हजार ९४१ कित्ता शेयर निष्काशन गरेको थियो ।
