Online Bichar
आइतबार, फाल्गुण २०, २०८० | Sunday, March 3, 2024

भद्रपुर, १६ वैशाख २०८० । भद्रपुर झापा गोल्डकपको आयोजनामा आज मेची रंगशालामा भद्रपुर नगरपालिकाभित्रका १४ देखि १६ वर्ष उमेर समूहका खेलाडीको सहभागितामा छनोट खेलहरू भएको छ ।

फागुनमा सम्पन्न प्रथम भद्रपुर झापा गोल्डकपको अपार सफलतापछि भद्रपुरमा ‘भद्रपुर झापा गोल्डकप युवा फुटबल प्रशिक्षण परियोजना’लाई सार्थकता प्रदान गर्नेक्रममा मेची रंगशालामा छनोटका खेलहरू भएका हुन् ।

खेलमा भद्रपुरका सबै वडाबाट आएका करिब २५० खेलाडीको सहभागितामा प्रतिस्पर्धा गराइएको आयोजक समितिका अध्यक्ष दीपेश ढकालले जानकारी दिए । उनका अनुसार १४–१६ उमेर समूहबाट चरणमा ५० देखि ५५ जना खेलाडी छनोट हुने र ती खेलाडीबीच पुनः प्रतिस्पर्धा गराई तीमध्ये अब्बल २५ जना खेलाडी छनोट गरी उनीहरूलाई नियमित प्रशिक्षण दिइनेछ ।

यस्तै छनोट खेल आगामी शनिवार १७–१९ उमेर समूहबीच पनि गराइनेछ भने त्यसबाट पनि पहिलो चरणमा ५० देखि ५५ जना र दोस्रो चरणमा २५ खेलाडी छनोट गरी नियमित प्रशिक्षण गराइने बताइएको छ ।

नगरभित्र कुना–कुनामा रहेका तर अवसर नपाइरहेका युवालाई अवसर प्रदान गर्ने र भद्रपुर झापा गोल्डकपको सशक्त आयोजक टिम तयार गर्ने उद्देश्यले कार्यसमितिको बैठकले नै भद्रपुर झापा गोल्डकप युवा फुटबल प्रशिक्षण परियोजना’ अभियान सञ्चालन गर्ने निर्णय गरेको थियो ।

झापा जिल्ला फुटबल संघका अध्यक्ष एवम् वरिष्ठ फुटबल प्रशिक्षक भगिरथ आले ‘मामा’को नेतृत्वमा गम्भीर राई, कर्ण लिम्बू, पूर्णमाया सुब्बा ९पुनम०, टेकबहादुर गुरुङ, मदन सुब्बा, भरत गुरुङलगायतको प्राविधिक टोलीले छनोट खेलहरूको सहजीकरण गरिरहेको महासचिव जीवनकुमार श्रेष्ठले जानकारी दिए ।

यस्तै, भद्रपुर झापा गोल्डकपले आगामी मंसिर–पुसतिर झापा जिल्ला स्तरीय अन्तर पालिका लिग कम नकआउट प्रतियोगिताको तयारी पनि गरिरहेको महासचिव श्रेष्ठले बताए कार्यसमितिको बैठकले निर्णय गरेको लिग कम नकआउट फुटबल प्रतियोगिता बारे जिल्लाका सबै स्थानीय तहलाई पत्राचार गरी टिम तयार गर्न आग्रह गरिएको पनि उनले बताए ।

झापालाई हरेक समय फुटबलमय बनाउने गरी भद्रपुर झापा गोल्डकपले आफ्ना गतिविधि अघि बढाइरहेको वरिष्ठ उपाध्यक्ष आदित्य पराजुलीले बताएका छन् ।

 

तपाईको प्रतिक्रिया