Online Bichar
शुक्रबार, माघ २०, २०७९ | Friday, February 3, 2023

काठमाडौं, २६ मंसिर २०७९ । माइक्रोब्लगिङ साइट ट्वीटरले शुल्क तिरेर भेरिफिकेसन ब्याज अर्थात् ब्लु टिक प्राप्त गर्ने सब्सक्रिप्सन प्याकेज पुनः सुरुवात गर्दैछ । आज डिसेम्बर १२ मा ट्वीटरले ब्लू टिक सब्सक्रिप्सन पुनः सुरु गर्न लागेको हो ।

यो सँगै अब प्रयोगकर्ताले शुल्क तिरेर आफ्नो अकाउन्ट भेरिफाइड गराउन सक्नेछन् र त्यस्ता भेरिफाइड अकाउन्टहरुमा ट्वीट एडिट गर्नेदेखि अन्य विभिन्न सुविधाहरु प्राप्त हुने बताइएको छ ।

ट्वीटरको यो सशुल्क सेवा खरिद गर्नका लागि मासिक ८ डलर शुल्क तिर्नुपर्नेछ । एप्पल आइओएस डिभाइसमा ट्वीटरको ब्लू सब्सक्रिप्सन लिनका लागि केही महंगो पर्नेछ । अर्थात् अब आइफोन प्रयोगकर्ताले ट्वीटरमा ब्लू टिक लिनका लागि मासिक ११ डलर तिर्नुपर्नेछ ।

ट्वीटरले यसपटक प्रयोगकर्ताका अकाउन्टको समीक्षा सुक्ष्म ढंगले गर्नेछ । केवल भेरिफाइड फोन नम्बरवालाका लागि मात्र अब ट्वीटरमा ब्लू टिक प्राप्त गर्नेछन् । यसका लागि ट्वीटरका कर्मचारी स्वयंले अकाउन्टहरुको समीक्षा गर्नेछन् ।

ट्वीटरका प्रडक्ट म्यानेजर एस्टर क्रफर्ड भन्छन्ः हामीले कुनै पनि खालको फर्जी तथा अवैध काम रोक्नका लागि केही नयाँ कदम उठाएका छौँ । कुनै पनि प्रयोगकर्तालाई ब्लू टिक दिनुभन्दा पहिले उसको अकाउन्ट राम्रोसँग समीक्षा गरिनेछ ।

अकाउन्टको समीक्षा र प्रमाणीकरण पश्चात् प्रयोगकर्तालाई भेरिफिकेसन ब्याज अर्थात् ब्लू टिक दिइनेछ । ब्लू टिकधारी अकाउन्टमा प्रयोगकर्ताले आफ्ना गरिसकेका ट्वीट एडिटसमेत गर्नसक्ने सुविधा रहने बताइएको छ ।

यद्यपि ट्वीट गरेको ३० मिनेट भित्रैमा ट्वीटलाई एडिट गरिसक्नुपर्ने हुन्छ । यसका अलावा ट्वीटरमा १०८० पिक्सेल भिडियो पनि अपलोड गर्न र लामो लामो ट्वीट समेत गर्न सकिनेछ । सब्सक्रिप्सन लिने प्रयोगकर्ताका ट्वीटलाई प्राथमिकता प्राप्त हुने र अन्य सामान्य प्रयोगकर्ताको तुलनामा उनीहरुले टाइमलाइनमा ५० प्रतिशत कम विज्ञापन देख्नेछन् ।

फोटो तथा नाम परिवर्तन गर्दा ब्लू टिक हट्नेछ

रोचक त के छ भने यदि ब्लू टिकधारी ट्वीटर अकाउन्टमा प्रयोगकर्ताले आफ्नो नाम वा प्रोफाइल तस्वीर परिवर्तन गर्यो भने अकाउन्टबाट ब्लू टिक हट्नेछ । त्यसपछि प्रयोगकर्ताको अकाउन्टको पुनः समीक्षा तथा भेरिफिकेसन गरेर मात्र ब्लू टिक दिइनेछ । कुनैपनि विशेष अभियान तथा विरोधमा आफ्नो ट्वीटरको प्रोफाइल तस्वीर वा नाम परिवर्तन गर्ने प्रयोगकर्तामाथि ट्वीटरले विशेष निगरानी गर्ने बताइएको छ ।

ट्वीटरले आफ्नो अफिसियल अकाउन्टबाट ट्वीट गर्दै भनेको छः सब्सक्राइबरहरुले आफ्नो ह्याण्डल, डिस्प्ले नाम वा प्रोफाइल फोटो परिवर्तन गर्न सक्नेछन् तर यसो गर्दा अस्थायी रुपमा ब्लू टिक हटाइनेछ । त्यसपछि उक्त अकाउन्ट पुनः भेरिफिकेसन गरिनेछ ।

ट्वीटरमा लगातार प्रयोग

विश्वका सर्वाधिक धनी व्यक्ति एलन मस्कले अघिल्लो महिना ट्वीटर खरीद गरेका थिए । ट्वीटर खरीदसँगै उनले लगातार यसमा विभिन्न परीक्षण गरिरहेका छन् । पहिलोपटक कम्पनीले ट्वीटर ब्लू सब्सक्रिप्सनका लागि सबैलाई ८ डलर शुल्क तोकेको थियो । तर पैसा दिएर ब्लू टिक प्राप्त हुँदा धेरै फर्जी अकाउन्टहरुले समेत ब्लू टिक लिएका थिए ।

त्यस्ता ब्लू टिकधारी फर्जी अकाउन्टहरुले गलत ट्वीट गर्दा विभिन्न कम्पनीहरुलाई भारी नोक्सान समेत भएको थियो । त्यसपछि ट्वीटरले ब्लू सब्सक्रिप्सन तत्कालका लागि खारेज गरेको घोषणा गरेको थियो । अहिले त्यसलाई पुनः नयाँ तरिकाबाट सुरु गर्न लागिएको हो । एजेन्सीको सहयोगमा

तपाईको प्रतिक्रिया
--> -->