परासी, २९ कात्तिक । नवलपरासीको सुस्ता गाउँपालिकाबाट प्रहरीले मावन बेचविखन तथा ओसार–पसार गर्ने एक महिला एजेन्टलाई पक्राउ र बेचन लगिएका तीनजना महिलाहरुको उद्दार गरेको छ । कुवेत पठाउने भन्दै भ्रममा पारेर भारतमा बेच्न लैजाने क्रममा प्रहरीले सुस्ता गाउँपालिका ५ बस्ने २८ बर्षीया एजेन्ट सुनिता गुरुङलाई पक्राउ गरेको हो ।
पक्राउ परेकी गुरुङको घरबाट सिन्धुपाल्चोक बाह्बिसे नगरपालिका ६ बस्ने २८ बर्षीय संगिता थामी, चौताराकी ३० बर्षीय ग्यामो सिर्पानी र बाँके राप्तीसुनसरीकी ३५ बर्षीय मनिषा विश्वकर्माको उद्दार गरेको प्रहरी चौकी रामनगरले जनाएको छ ।
एजेन्ट गुरुङ्गले तीनैजना महिलाहरुलाई जिल्लाको पक्लिहवाँ नाकाबाट छिराउँदै भारतको गोरखपुरबाट रेल चढाई दिल्ली लैजाने र दिल्लीबाट कुवेत पठाउने भनेर भारतीय एजेन्टलाई गोरखपुरमा जिम्मा लगाउने योजना बनाएको खुलेको छ ।
प्रहरीले गुरुङले एकजना महिलालाई भारतको गोरखपुरसम्म पुर्याउँदा खर्च कटाएर १० हजार रुपैयाँ कमिसन लिने गरेको जनाएको छ ।
