गौरादह, १२ साउन २०७८ । झापाको गौरादहमा प्रत्येक दिन कोरोना संक्रमणको जोखिम बढ्दै गएको पाइएको छ । मंगलबार(आज)बाट ७ दिनको लागि आंशिक लकडाउन सुरु भएको पहिलो दिन १५ जना संक्रमित थप भएका छन् । आज थपिएका संक्रमितहरु पीसीआर परिक्षणबाट ७ जना र रेपिड एन्टिजेन परिक्षणबाट ८ जना रहेका छन् ।

एकैदिन १५ जना संक्रमित थप भएसँगै गौरादहमा कोरोना संक्रमणको दोस्रो लहर देखा परेसँगै संक्रमित हुनेको संख्या ४ सय १९ पुगेको गौरादह नगर स्वास्थ्य शाखाले जनाएको छ । यस्तै, आज कोहि पनि संक्रमित निको भएर डिस्चार्ज भएका छैनन् । दोस्रो लहरको संक्रमण देखिएसँगै संक्रमित भई निको भएर डिस्चार्ज हुनेको संख्या २ सय ४७ पुगेको जनाइएको छ । यस्तै, कोरोना संक्रमित भएर होम आइसोलेसनमा बस्नेको संख्या १ सय ५६ पुगेको छ । कोरोना संक्रमणका कारण बिरामी भई विभिन्न हस्पिटलको आइसोलेसनमा ९ जना संक्रमित उपचाररत रहेका छन् ।

दोस्रो लहरको भेरियन्ट देखिएसँगै सक्रिय संक्रमितको संख्या १ सय ६५ पुगेको छ । ३५ वडा बेड रहेको आइसोलेसनमा १४ वटा अक्सिजन सिलिन्डर तयारी अवस्थामा रहेको जनाइएको छ । आज सम्म पीसीआर परिक्षणबाट १ सय ४० जनाको र रेपिड एन्टिजेन परिक्षणबाट ८ सय २३ जनाको कोरोना जाच गरिएको जनाइएको छ । दोस्रो लहरको कोरोना संक्रमण देखिएसँगै गौरादहमा कोरोनाका कारण मृत्यु हुनेको संख्या ३ महिला र ४ पुरुष गरि ७ पुगेको जनाइएको छ ।

 

तपाईको प्रतिक्रिया

Comments