काठमाडौं, ५ असार २०७८ । विश्व बैंकले नेपाललाई ९ सय ८२ थान १० लिटर क्षमताका अक्सिजन कन्सेन्ट्रेटर सहयोग गरेको छ ।
कोभिड–१९ महामारीविरुद्ध उपचार तथा दीर्घकालीन अक्सिजन आपूर्ति क्षमता बढाउनका लागि सहयोग गरिएको बैंकले जनाएको छ । विश्व बैंकको आर्थिक सहयोगमा यूएनओपीएसमार्फत् अक्सिजन कन्सेन्ट्रेटर ल्याइएको हो ।
विश्व बैंकले नेपाललाई महामारीमा तत्काल प्रतिकार्य, कोभिड खोप खरिद र स्वास्थ्य प्रणाली सुधार तथा तयारीका लागि १ सय ४ मिलियन डलर सहयोग गरेको छ ।
विश्व बैंकका देशीय निर्देशक फरिस हजदद–जर्भोसले विपत्तिमा नेपाल सरकार र विकास साझेदारहरूसँग सहकार्य गरी नेपाल र नेपालीलाई सहयोग गर्न पाउँदा खुसी लागेको बताउनुभयो ।
