भरतपुर, १८ भदौ । बाँचुन्जेल अस्पताल चहार्दैमा दिक्क भएका चितवनका तीन जना बिरामी अन्तिम अवस्थामा भरतपुर अस्पताल त पुगे तर त्यहाँ कुनै पनि परीक्षण हुन नपाइ उनीहरूको मृत्यु भयो । मरेपछि बिरामीको स्वाब परीक्षण गर्दा उनीहरूमा कोरोना पोजेटिभ देखियो ।
तीनै जना बिरामीको भरतपुर अस्पतालमा मृत्यु भएको हो । चितवनका वरिष्ठ फिजिसियनसमेत रहनुभएका भरतपुर अस्पतालका अध्यक्ष डा। भोजराज अधिकारी उनीहरू अन्तिम अवस्थामा मात्रै आइपुगेकाले उपचार गर्न नभ्याएको प्रतिक्रिया दिनुभयो ।
“श्वास प्रश्वासको समस्या भएपछि बिरामी अस्पताल चाहर्दा–चाहर्दै अन्तिममा भरतपुर अस्पताल आइपुगेकाले उनीहरूको कुनै पनि परीक्षण गर्न नपाउँदै मृत्यु भयो”, उहाँले भन्नुभयो । अस्पतालमा सोमबार राति मृत्यु हुनेमा खैरहनी नगरपालिका–१३ की ५५ वर्षीया महिला, भरतपुर महानगरपालिका–११ का ६५ वर्षीय पुरुष र सोही स्थानकी १८ वर्षीय युवती रहेको बताइएको छ । उनीहरू पहिला निजी अस्पतालहरू चहार्दाचाहर्दैमा समय बितिसकेको थियो ।
भरतपुर अस्पतालका प्रवक्ता लीलाधर पौडेल कति बिरामीलाई उपचार गर्न निजी क्षेत्रका अस्पतालले नमानेको आरोप लगाउनुहुन्छ । “कुनै पनि अस्पतालमा आएका बिरामीलाई तत्काल सोही अस्पतालले व्यवस्थापन गरेर आफूसँग आईसीयू नभए खाली भएको अस्पतालमा समन्वय गरेर रिफर गर्ने हो भने बिरामीको मृत्युदर कम गराउन सकिन्थ्योे”, उहाँले भन्नुभयो ।
कतिपय बिरामीले तत्काल अक्सिजन र भ्यान्टिलेटर पाए बचाउन सकिने तर यस्ता बिरामी अस्पताल आउनै ढिला हुनेभएको समस्या हुने गरेको उहाँले जनाउनुभयो । जिल्ला प्रशासन कार्यालय चितवनले जिल्लाका निजी अस्पताललाई सोमबार मात्रै सूचना जारी गरेर अस्पतालमा आउने ज्वरोका बिरामीको उपचार गर्न अनुरोध गरेको थियो । सूचना जारी भएकै दिन उपचारको अभावमा तीन जना बिरामीले मृत्यु भएको हो ।
भरतपुर महानगरपालिका–६ का एक वृद्धाको कोरोना सङ्क्रमणकै कारण मृत्यु भएको कलेजले विज्ञप्ति जारी गरेर जनाएको छ । यस्तै, हेटौँडा उपमहानगरपालिकाकी ५८ वर्षीया महिलाको सोमबार नै राति मृत्यु भएको हो ।
श्वास–प्रश्वासको समस्या भएर अस्पताल भर्ना भएकी ती महिलाको कोरोना परीक्षण गर्दा नतिजा पोजेटिभ आएको कलेजले विज्ञप्ति जारी गरेर जनाएको छ ।
चितवनका अस्पतालमा कोरोनाबाट अहिलेसम्म १७ जनाको मृत्यु भइसकेको छ । मृत्यु हुनेमा चितवनका नौ जना छन् । गोरखापत्र दैनिक अनलाइनबाट।
