Online Bichar
बिहिबार, बैशाख १३, २०८१ | Thursday, April 25, 2024

काठ्माडौं, ११ जेठ । स्वास्थ्य तथा जनसंख्या मन्त्रालयले आइतबार दिउँसो थप १९ जनामा कोरोना संक्रमण पुष्टि भएको जनाएको छ । यो सँगै नेपालमा कोरोना संक्रमितहुने व्यक्तिहरुको संख्या ६ सय ३ पुगेको छ । जसमा ५ सय २४ जना पुरुष र महिला ७९ जना रहेका छन् । जसमध्ये ८७ जना निको भएर गएका छन् ।

मन्त्रालयले आयोजना गरेको नियमित मिडिया ब्रिफिङका क्रममा प्रवक्ता डा. विकास देवकोटाले संक्रमित हुनेमा मोरङका एकजना ,बाराका एकजना, पर्साका तीनजना, रौतहटका एकजना, सर्लाहीका एकजना, रुपन्देहीका तीनजना र काठमाडौंका एकजनामा संक्रमण देखिएको बताए । त्यसैगरी नुवाकोटका एकजना, रुपन्देहीका तीनजना, कपिलवस्तुका तीनजना र गुल्मीका एकजनामा संक्रमण देखिएको छ ।

हालसम्म कोरोना संक्रमण ४२ जिल्लामा फैलिसकेको छ जसमा आइतबार पहिलोपटक नुवाकोटमा संक्रमण देखिएको छ ।

मन्त्रालयका अनुसार हालसम्म नेपालमा आरडीटी विधिबाट ९० हजार २६ नमुना परीक्षण भएका छन् । पीसीआर विधिबाट भने हालसम्म ४८ हजार ८ सय १५ परीक्षणहरु गरिएका छन् । जसमा गत २४ घण्टामा ३ हजार ७ सय ९१ वटा आरडीटी विधिबाट र २ हजार ८ सय ५६ वटा पीसीआर विधिबाट परीक्षण भएका छन् ।
हालसम्म क्वारेन्टाइनमा ३९ हजार ८ सय ४ जना व्यक्तिहरु रहेको जनाएको छ । हालसम्म ५ सय १३ जना व्यक्ति आइसोलेसनमा रहेका छन् । ४ सय ४७ जना व्यक्तिहरु  रेडजोनमा परेका छन् । हालसम्म संक्रमण पुष्टि भएकामध्ये सिन्धुपाल्चोकमा एक,बाँकेमा एक र गुल्मीमा एक गरी ३ जनाको मृत्यु भएको छ ।

तपाईको प्रतिक्रिया