काठमाडौं, चैत ७ । सातै प्रदेशका मुख्यमन्त्रीहरु संगको भेट पछि प्रधानमन्त्रीले छिट्टै नेपाल सरकारको तर्फबाट स्वेत पत्र जारी गर्ने बताएका छन् ।
प्रधानमन्त्रीका राजनीतिक सल्लाहकार विष्णु रिमालका अनुसार प्रधानमन्त्री केपी शर्मा ओलीले प्रदेशका मुख्यमन्त्रीसँग आजको लगातार ६ घन्टा लामो छलफल र बैठक पछि स्वेत पत्र मार्फत प्रदेशका समस्याहरु तत्काललाई सम्बोधन गरिने बताएका हुन् ।
बुधबार बिहान सवा ११ बजे प्रधानमन्त्री तथा मन्त्रिपरिषद् कार्यालयमा सुरु भएको बैठक साँझ सवा ५ बजे सकिएको हो।
बैठकमा प्रदेश सरकारले भोग्नु परेका कर्मचारी, कानून र बजेट अभावका विषयमा सातै मुख्यमन्त्रीले आफ्ना धारणा राखेका थिए।
‘हामीले प्रदेश सरकारमा गाडी नभएकोदेखि केन्द्रबाट गएका कर्मचारी असहयोग गरेसम्मका कुरा सुनाऔं,’ बैठकपछि संवाददातासँग कुरा गर्दै प्रदेश नम्बर २ का मुख्यमन्त्री लालबाबु राउतले भने, ‘केन्द्र र प्रदेश सरकारको तालमेल, राजश्व बाँडफाँडका विषयमा पनि छलफल भयो।’
बैठकमा केन्द्र सरकारका मन्त्रीसँगै प्रदेशका प्रमुख सचिवहरुको पनि उपस्थिति थियो। केन्द्रीय मन्त्रीले आफ्नो मन्त्रालय मातहतका तहमा भएका समस्याबारे सुनाएका थिए।
