दमक, २६ असोज २०८३ । झापाको दमक-६ स्थित थाना रोडमा करिब १० करोड रुपैयाँ लगानीमा एभरेष्ट हाइपर मार्केट प्रालिको तेस्रो शाखा सञ्चालनमा आएको छ।
एउटै छानामुनि दैनिक उपभोग्य वस्तुदेखि खाद्यान्न, सागसब्जी, लत्ताकपडा, जुत्ताचप्पल र घरायसी आवश्यकताका सामग्री उपलब्ध गराउने उद्देश्यले हाइपर मार्केट सञ्चालनमा ल्याइएको हो।
बाह्रदशी गाउँपालिका-२ जनता निवासी युवा व्यवसायी चान मोहम्मदले हाइपर मार्केटको सेवा विस्तार गर्ने क्रममा दशकमा तेस्रो शाखा सञ्चालनमा ल्याएका हुन् । हाइपर मार्केटको उद्घाटन दमक नगरपालिकाका मेयर रामकुमार थापाले गरेका हुन् ।
विजयादशमीको अवसरमा घटस्थापनाका दिन उद्घाटन गरिएको हाइपर मार्केटले दमक तथा आसपासका क्षेत्रका उपभोक्तालाई सहज, व्यवस्थित र सुविधाजनक किनमेलको सुविधा उपलब्ध गराउने लक्ष्य राखेको छ। गुणस्तरीय वस्तु सुपथ मूल्यमा उपलब्ध गराउने र उपभोक्तालाई आवश्यक सामग्री खरिद गर्न विभिन्न पसल धाउनुपर्ने बाध्यता कम गर्ने उद्देश्यसहित नयाँ शाखा विस्तार गरिएको कम्पनीले जनाएको छ।
दमकको व्यापारिक केन्द्र थाना रोडमा सञ्चालनमा आएको हाइपर मार्केट बिहान ७ बजेदेखि राति १० बजेसम्म खुला रहनेछ। लामो समयसम्म किनमेलको सुविधा उपलब्ध गराउँदा उपभोक्ताले आफ्नो अनुकूल समयमा आवश्यक सामग्री खरिद गर्न सक्ने कम्पनीको विश्वास छ।
एभरेष्ट हाइपर मार्केट प्रालिले राजगढबाट सुरु गरेको व्यवसायलाई बिर्तामोड हुँदै दमकसम्म विस्तार गरेको हो। ग्राहकको विश्वास र व्यवसायप्रतिको आकर्षण बढ्दै गएपछि तेस्रो शाखा सञ्चालनमा ल्याइएको कम्पनीले जनाएको छ। आगामी दिनमा इटहरी र काठमाडौंसम्म शाखा विस्तार गर्ने लक्ष्यसमेत कम्पनीले अघि सारेको छ।
एभरेष्ट हाइपर मार्केटको मुख्य कार्यालय झापाको बाह्रदशी गाउँपालिका–३, राजगढ बजारमा छ। कोरोना महामारीका कारण आर्थिक तथा व्यावसायिक गतिविधि प्रभावित भइरहेका बेला राजगढमा ‘सस्तो बजार’ सञ्चालन गरेर कम्पनीले आफ्नो व्यावसायिक यात्रा सुरु गरेको थियो।
कम्पनीले सन् २०२१ मा राजगढमा पहिलो शाखा सञ्चालनमा ल्याएको थियो। त्यसपछि सन् २०२४ मा बिर्तामोडमा दोस्रो शाखा विस्तार गरियो। राजगढ र बिर्तामोडमा प्राप्त अनुभव, उपभोक्ताको विश्वास र बजारको सम्भावनालाई आधार बनाएर दमकमा तेस्रो शाखा सञ्चालनमा ल्याइएको कम्पनीले जनाएको छ।
सुरुवाती चरणमा सीमित बजारबाट सुरु भएको व्यवसायलाई फराकिलो बनाउँदै लैजानुमा उपभोक्ताको साथ र सहयोग महत्वपूर्ण रहेको कम्पनीको भनाइ छ। व्यवसाय विस्तारसँगै सेवा क्षेत्र बढाउने, उपभोक्तालाई आवश्यक सामग्री एकै स्थानमा उपलब्ध गराउने र स्थानीय बजारमा आर्थिक गतिविधि बढाउने लक्ष्य राखिएको छ।
दमकमा नयाँ शाखा सञ्चालनमा आएपछि उपभोक्ताले खाद्यान्न, सागसब्जी, लत्ताकपडा, जुत्ताचप्पललगायत विभिन्न सामग्री एउटै स्थानबाट खरिद गर्न सक्नेछन्। बजारमा अलग–अलग पसलमा पुगेर सामग्री खोज्नुपर्ने अवस्थालाई सहज बनाउँदै किनमेललाई व्यवस्थित गर्ने गरी हाइपर मार्केट सञ्चालन गरिएको कम्पनीले जनाएको छ।
एभरेष्ट हाइपर मार्केटका सञ्चालक मोहम्मदले अन्तर्राष्ट्रिय बजारमा स्थापित लुलु हाइपर मार्केटमा करिब दुई दशक काम गरेको अनुभव हासिल गरेका छन्। त्यहाँ जनरल म्यानेजरका रूपमा समेत काम गरेका सञ्चालकले विदेशमा आर्जन गरेको ज्ञान, सीप र व्यवस्थापकीय दक्षतालाई स्वदेशमै उपयोग गर्ने उद्देश्यले नेपालमा व्यवसाय विस्तार गरेका हुन्।
अन्तर्राष्ट्रियस्तरको व्यावसायिक अभ्यासबाट प्राप्त अनुभवलाई नेपालको बजार, उपभोक्ताको आवश्यकता र क्रयशक्तिअनुसार प्रयोग गर्ने प्रयास भइरहेको कम्पनीले जनाएको छ। उपभोक्तालाई गुणस्तरीय सामग्री उपलब्ध गराउनुका साथै सेवा प्रवाहलाई सहज र व्यवस्थित बनाउने रणनीति अपनाइएको छ।
