काठमाडौं, १० माघ । वरिष्ठ साहित्यकार प्रा. मोहनराज शर्माको विहिबार ८१ वर्षको उमेरमा निधन भएको छ। मधुमेह, रक्तचाप र अन्य रोगबाट पीडित उनको कलङ्कीस्थित नेशनल अस्पतालमा विहिबार निधन भएको हो। शर्माका समालोचनाका साथै नाटक, कथा, कविता, उपन्यास, भाषाशास्त्र आदि विषयमा प्रशस्तै कृति प्रकाशित छन् । उच्च शिक्षाको नेपाली विषयमा शर्माका कृतिहरूको अध्ययन गरिन्छ। उनको जन्म विसं १९९४ कात्तिकमा काठमाडौँमा भएको थियो।
त्रिभुवन विश्वविद्यालय, नेपाली केन्द्रीय विभागका प्रा डा लक्ष्मणप्रसाद गौतमका अनुसार शर्माका छोरा विदेशबाट आउन समय लाग्ने भएकाले शुक्रबार मात्र उनको अन्त्येष्टि गरिनेछ। शर्माको पार्थिव शरीर पशुपतिको शवगृहमा राखिएको छ। डा गौतमले शर्मा आफ्ना विद्यावारिधि गुरुसमेत रहेको स्मरण गर्दै उनले नेपाली साहित्यका प्रायः सबै विधामा योगदान दिएको बताए।
