काठमाडौं, १४ साउन । सर्वोच्च अदालतले ३८ क्विन्टल सुन तस्करी र सनम शाक्य हत्या प्रकरणको मुद्दामा आज निर्णय सुनाउँदैछ ।
जिल्ला अदालत मोरङ, उच्च अदालत विराटनगर हुँदै सर्वोच्च आईपुगेको मुद्दामा दुई साता लामो बहसपछि आजका लागि निर्णय सुनाउने मिति तोकिएको छ ।
न्यायाधीशद्वय अनिलकुमार सिन्हा र शुष्मालता माथेमाको इजलासले निरन्तर सुनुवाई गर्दै यो मुद्दामा निर्णय गर्न लागेको हो ।
जिल्ला अदालत मोरङले धरौटीमा छोड्न अस्वीकार गरेपछि आरोपितहरु उच्च अदालत विराटनगर पुगेका थिए ।
तर उच्च अदालतले पनि धरौटीमा छोड्न अस्वीकार गरेपछि उनीहरुले सर्वोच्चमा निवेदन दिएका थिए ।
सर्वोच्चमा मुद्दा लम्बिएपछि जिल्ला अदालतले उक्त मुद्दामा अन्तिम सुनुवाइ सुरु गर्न सकेको छैन ।
थुनछेक आदेशमा न्यायिक विचलनमा परेको आरोपमा उच्च अदालत विराटनगरका मुख्य न्यायाधीशसहित अन्य न्यायाधीश छानबिनमा तानिएपछि यो प्रकरण झनै जेलिएको हो ।
न्याय परिषदले उच्च अदालतका न्यायाधीश उमेशकुमार सिंहलाई बर्खास्त गरेपछि सर्वोच्चमा यो मुद्दाको अन्तिम सुनुवाइ सुरु भएको थियो ।
पक्षका कानुन व्यवसायी र सरकारी पक्षको बहस हिजो समाप्त भएपछि आज निर्णय सुनाउने मिति इजलासले तोकेको हो ।
आरोपीहरु डिएसपी सञ्जयबहादुर राउत, तुलाराम थारु, रामकुमार तिवारी, गोविन्दप्रसाद निरौला, राजन थापा, गोपालकुमार श्रेष्ठ, हेमन्त गौतम, सम्विरप्रसाद तोलाङ्गे, महावीरप्रसाद गोल्यान, मदन सिलवाल, अमरमान डंगोल र बालकृष्ण सञ्जेलले तल्ला अदालतलाई चुनौती दिदै सर्वोच्च गुहारेका हुन् ।
