झापा, ३१ असार २०८३ । झापामा एकैदिन ६ वटा दुर्घटना भएको छ । दुर्घटनामा आधा दर्जनभन्दा बढी घाइते भएका छन् । गएराति १०ः३० बजे कन्काई वडा नं ३ सुरुङगास्थित पूर्वपश्चिम राजमार्गमा दुर्गापुरबाट शिवगंजतर्फ जाँदै गरेको प्र।१–०१–०१६प ६२६२ नं. को मोटरसाइकल आफै अनियन्त्रित भई दुर्घटना मोटरसाइकल चालक शिवसताक्षी-६ बस्ने ३६ वर्षीय रत्न सहनी घाइते भएका छन् । उनको बिर्तासिटि अस्पताल बिर्तामोडमा उपचार भइरहेको छ ।
त्यस्तै हिजो दिउँसो ३ बजे कमल-३ सानो केर्खास्थित पूर्वपश्चिम राजमार्गमा धरमपुरबाट केर्खातर्फ जाँदै गरेको अनटेस्ट इभी स्कुल भेन आफै अनियन्त्रित भई बाटोमुनि खसेर दुर्घटना भएको छ । दुर्घटनामा भेन चालक कमल-४ बस्ने ४८ वर्षीय अमृतबहादुर फागो घाइते भएका छन् । उनको स्थानीय मेडिकलमा उपचार भइरहेको छ ।
त्यस्तै गएराति ९ः३० बजे दमक-३ मिल चोकस्थित भित्री सडकखण्डमा दमकबाट मधुमल्लातर्फ जाँदै गरेको प्रदेश न.१–०२–०४१ प ९६४५ नम्बरको मोटरसाइकल आफै अनियन्त्रित भई दुर्घटना हुँदा मोटरसाइकल चालक कमल-३ बस्ने ४८ वर्षीय तेजबहादुर थापा गंभीर घाइते भएका छन् । टाउको र बायाँ हातमा चोट लागेका थापाको दमक अस्पताल दमकमा उपचार भइरहेको छ ।
त्यस्तै हिजो साँझ ६ः३५ बजे बिर्तामोड ३ दृष्टि आँखा अस्पतालअगाडी बिर्तामोड– भद्रपुर पक्की सडकखण्डमा बिर्तामोडबाट बनियानीतर्फ जाँदै गरेको प्र१–०१–००१क १०१३ न. को टिपरले बाटो क्रस गर्दै गरेकी पैदलयात्री बिर्तामोड ३ बस्ने ७० वर्षीया लिलामाया बुढाथोकीलाई ठक्कर दिएको छ । गंभीर घाइते बुढाथोकीलाई उपचारको लागि बीएण्डसी अस्पताल बिर्तामोड लगिएको छ । टिपर र टिपर चालक कचनकवल-५ बस्ने २१ वर्षीय जावेद आलमलाई नियन्त्रणमा लिई इलाका प्रहरी कार्यालय बिर्तामोडमा राखिएको छ ।
