विराटनगर, १५ असोज २०८३ । कोशी प्रदेशको सत्ता समीकरण फेरिएपछि योजना आयोगका सदस्य पनि फेरिएका छन् । एमाले र कांग्रेसबीच सत्ता समीकरण हुँदा कांग्रेसको कोटाबाट नारायण कोइराला र मनिता घिमिरे नियुक्त भएका थिए ।
९ साउनको एमाले र नेकपाबीचको सहमतिपछि कोशी प्रदेशमा १ भदौमा नेकपा सरकारमा सहभागी भएको थियो । कांग्रेसले सरकार छाडेपछि कांग्रेस कोटामा सदस्य भएका कोइराला र घिमिरले बुधबार राजीनामा दिएका थिए ।
बिहीबार मन्त्रिपरिषद् बैठकले विराटनगरका तोयानाथ खतिवडा र खोटाङकी हरिकुमारी राईलाई आयोगको सदस्यमा नियुक्त गरेको छ । उनीहरू दुवै नेकपाको कोटामा सदस्य नियुक्त भएका हुन् ।
योजना आयोगको उपाध्यक्षमा एमालेको कोटामा नियुक्त भएका तारानाथ निरौला छन् । गत वर्ष २० कात्तिकमा एमालेकै कोटाका उपाध्यक्ष डा राजेन्द्र अधिकारीले राजीनामा दिएका थिए ।
उनको राजीनामापछि मंसिर ३ गते आयोगको उपाध्यक्षमा विराटनगरका तारानाथ निरौला नियुक्त भएका थिए ।
बिहीबार बसेको मन्त्रीपरिषद् बैठकले मुख्यमन्त्री सम्मेलनको मिति पनि परिवर्तन गरेको छ । आन्तरिक मामिला तथा कानुनमन्त्री गोम्बु शेर्पाका अनुसार यसअघि असोज २२ र २३ गते गर्ने तय भएको सम्मेलन असोज २७ र २८ गतेका लागि सारिएको हो ।
