काठमाडौं, ८ असार २०८३ । अख्तियार दुरुपयोग अनुसन्धान आयोगले राहदानी छपाइमा भएको भ्रष्टाचार प्रकरणमा पूर्वपरराष्ट्रमन्त्री डा. आरजु राणा देउवाको विषयमा विशेष अदालतको निर्णयपछि मात्र अनुसन्धान गर्ने भएको छ ।
अख्तियार स्रोतका अनुसार राहदानी छपाइ प्रकरणको ठेक्का प्रक्रियामा भ्रष्टाचारजन्य कार्यमा आशंका रहे पनि पछि भिन्नै अनुसन्धान गर्ने गरी हालका लागि उजुरी मुलतबीमा राखिएको छ । ‘अदालतको निर्णयपछि के हुन्छ, सोही अनुरुप अनुसन्धान गर्ने गरी तत्काललाई उजुरी मुलतबीमा रहेको छ,’ अख्तियार स्रोतले बतायो ।
राहदानी छपाइ ठेक्का प्रकरणमा राहदानी विभागका महानिर्देशक तीर्थराज अर्यालसहित १८ जनाविरुद्ध सोमबार (असार ८) अख्तियारले भ्रष्टाचार मुद्दा दायर गरेको थियो । उक्त मुद्दामा कुल १० अर्ब १३ करोड ४ लाख ६१ हजार ४७७ रूपैयाँ बिगो दाबी रहेको छ ।
उक्त प्रकरणमा दुई जर्मन कम्पनीका नेपाली प्रतिनिधिलाई समेत प्रतिवादी बनाएर मुद्दा दर्ता भएको छ । राहदानी छपाइमा भएको अनियमिततालाई लिएर तत्कालीन परराष्ट्रमन्त्री राणालाई पनि अख्तियारले बयानमा बोलाएको थियो ।
यसअघि अख्तियारले अनुसन्धानको सिलसिलामा बूढानीलकण्ठस्थित देउवा निवासमा म्याद टाँसेर आरजुलाई बयानमा लागि डाकेको थियो । उनले भने हङकङबाट इमेल पठाएर उपचारका क्रममा रहेकाले अहिले आफू आउन नसक्ने जवाफ दिएकी थिइन् ।
