काठमाडौँ, १६ वैशाख २०८२ । सरकार र आन्दोलनरत शिक्षक महासंघबीच अहिले सिंहदरबारमा वार्ता भइरहेको छ । नेपाल शिक्षक संघका महासचिव ज्ञानेन्द्र रावलले वार्ता जारी रहेको जानकारी दिए ।
मंगलबार दिउँसो वार्ता हुने अपेक्षा गरिए पनि शिक्षक महासंघ बैठकमा व्यस्त भएपछि दिनभर वार्ता हुन सकेको थिएन । अहिले साँझबाट वार्ता सुरु भएको हो ।
दिउँसो वार्ता सुरु हुन नसक्नुको कारणबारे जिज्ञासा राख्दा शिक्षा मन्त्रालयका सूचना अधिकारी निलकण्ठ ढकालले शिक्षामन्त्री पन्त शिक्षकको पर्खाइमा रहेको तर उनीहरू नआएको बताएका थिए ।
यता, शिक्षक महासंघका पदाधिकारीहरूले भने आफूहरूलाई वार्ताबारे औपचारिक जानकारी नै नभएको बताएका थिए ।
नेपाल शिक्षक महासंघका महासचिव तुलाबहादुर थापाले आफूहरूलाई वार्ताका विषयमा थाहा नभएको बताएका थिए ।
महासंघको बैठक सकिएपछि शिक्षक प्रतिनिधि वार्तामा गएका हुन् । संघीय शिक्षा ऐन जारी हुनुपर्ने मागसहित शिक्षक महासंघ विगत २८ दिनयता निरन्तर सडक आन्दोलनमा छ ।
रघुजी पन्त शिक्षामन्त्री बनेर आएपछि उनले शिक्षक महासंघका प्रतिनिधिसँग केही चरणमा वार्ता गरे पनि शिक्षक–सरकार वार्ताले सार्थकता पाउन सकेको छैन ।
