तुलसीपुर, २९ माघ २०८१ । दाङको तुलसीपुर उपमहानगरपालिका–१९ संग्राम निवासी ६४ वर्षीया इश्वरी वलीको खाना पकाउने क्रममा आगलागीबाट मृत्यु भएको छ ।
माघ २१ गते साँझ ७ बजे घरमा खाना पकाउने क्रममा चुलोबाट कपडामा आगो सल्किँदा पेट र घुँडाको बीचको भागमा गम्भीर रूपमा जलेकी वलीलाई उपचारका लागि चिनारी अस्पताल, तुलसीपुरमा प्रारम्भिक उपचारपछि लुम्बिनी प्रादेशिक अस्पताल, बुटवल हुँदै कीर्तिपुर अस्पताल, काठमाडौं लगिएको थियो ।
कीर्तिपुर अस्पतालमा उपचार सम्भव नभएपछि माघ २८ गते बिहान ५ बजे राप्ती प्रादेशिक अस्पताल, तुलसीपुरमा ल्याइएको थियो । उपचारकै क्रममा आज बिहान ७ः३० बजे वलीको मृत्यु भएको इलाका प्रहरी कार्यालय तुलसीपुरका प्रहरी निरीक्षक सुर्यबहादुर रानाले जानकारी दिए ।
हाल शव सोही अस्पतालमा राखिएको छ । यस घटनाले खाना पकाउने क्रममा आगलागीबाट हुनसक्ने जोखिमप्रति सचेत रहनुपर्ने आवश्यकता औंल्याएको छ ।
