सोलुखुम्बु, १ माघ २०८१ । सोलुखुम्बुको महाकुलुङ गाउँपालिका–४ स्थित निर्माणाधीन मकालु एपेक्स हाइड्रोपावरमा ब्लास्टिङ गर्ने क्रममा तीन जना मजदुर घाइते भएका छन्।
घाइते हुनेमा नवलपरासी बर्दाघाटका राजेन्द्र विक, रुकुम आठबिसकोटका हरिसचन्द्र बोहरा र सोही ठेगानाका नरबहादुर मगर रहेका छन्।
बिहान अन्दाजी ९ बजे भएको सो घटनालगत्तै घाइतेहरूलाई बुङ अस्पताल र छेस्काम स्वास्थ्य चौकीमा प्राथमिक उपचार गरिएको थियो।
थप उपचारका लागि सिम्रिक एयरको हेलिकोप्टरमार्फत काठमाडौं लगिएको छ। घाइतेहरूको काठमाडौं सिनामंगलस्थित केएमसी अस्पतालमा उपचार भइरहेको प्रमुख जिल्ला अधिकारी अनोज कुमार घिमिरेले बताए।
