जनकपुरधाम, ९ चैत २०७९ । प्रादेशिक अस्पताल जनकपुरको ल्याबमा गलत रिपोर्ट दिएको पाइएपछि निर्देशक डा। प्रमोद यादव जिम्मेवारीबाट हटाइएका छन् ।
मुख्यमन्त्री सरोजकुमार यादवको निर्देशनमा निर्देशक यादवलाई कारबाही स्वरुप बिहीबार प्रदेशको सामाजिक विकास मन्त्रालयले जिम्मेवारीबाट मुक्त गरेको हो ।
अनलाइनखबरले अस्पतालको ल्याबले गलत रिपोर्ट दिएको समाचार सार्वजनिक गरेपछि निर्देशकलाई पदमुक्त गरी मन्त्रालय तानेको मुख्यमन्त्रीका प्रेस सल्लाहकार सीताराम अग्रहरीले जानकारी दिए । गलत रिपोर्ट दिनेहरुमाथि अनुसन्धान भइरहेको र कारबाही गरिने मन्त्रालयले जनाएको छ ।
समाचार सार्वजनिक भएपछि मुख्यमन्त्री सरोजकुमार यादवले भोलिपल्टै अस्पतालको आकस्मिक निरीक्षण गरेका थिए । सो क्रममा उनले तत्काल निर्देशक डा. यादवलगायत ल्याबको गलत रिपोर्ट दिनेहरुमाथि कारबाही गर्न सामाजिक विकास मन्त्री सुरिता साहलाई निर्देशन दिएका थिए ।
मधेश स्वास्थ्य विज्ञान प्रतिष्ठान मातहत आएको एक वर्षयता प्रादेशिक अस्पतालको उपचार सेवा अस्तव्यस्त बनेको छ । प्रतिष्ठान र प्रादेशिक अस्पतालका पदाधिकारी तथा कर्मचारीबीच छैन । सेवा भद्रगोल भएपछि प्रादेशिक अस्पतालमा भएको उपकरण थन्क्याएर रेफर सेन्टरमा परिणत भएको छ ।
