काठमाडौं, ६ मंसिर २०७८ । सर्वोच्च अदालतको संशोधन (दोस्रो संशोधन) नियमावली २०७८ सोमबार राजपत्रमा प्रकाशित भएको छ ।
गोलाप्रथाबाट पेशी तोक्ने व्यवस्था सहितको सर्वोच्च अदालत (दोस्रो संशोधन) नियमावली राजपत्रमा प्रकाशित गरिएको हो । योसँगै प्रधान्यायाधीश चोलेन्द्र समशेर जवराको अधिकार कटौती भएको छ । यसअघि प्रधानन्यायाधीश जबराले आफ्नो तजबिजमा पेशी तोक्दै आउनुभएको थियो । अब गोलाप्रथाबाट मात्रै पेशी तोकिनेछ ।
मंसिर २ गते बसेको सर्वोच्च अदालतको पूर्ण बैठक (फूल कोर्ट) ले पेशी तोक्ने प्रधानन्यायाधीशको अधिकार कटौती गरी गोला प्रथाबाट पेशी तोक्ने गरी सर्वोच्च अदालत नियमावली २०७४ लाई संशोधन गरेको थियो ।
राजपत्रमा प्रकाशित नियमावली कहिलेबाट लागू गर्ने भन्नेबारे पनि फूलकोर्टले नै निर्णय गर्नुपर्छ । न्यायालयमा सुधार र प्रधानन्यायाधीश जबराको राजीनामा माग गर्दै नेपाल बार एसोसिएसनसहित कानुन व्यवसायीहरूले झण्डै एक महिनादेखि आन्दोलन गरिरहेको छन् ।
